may dapithapong nangingiming pumanaog sa dilim
dahil walang lambing ang umagang lumisan
walang init na mahanap ang gabi
kumot sa bangungot na tangan
may alinlangan ang bukang liwayway sa pagmulat
dahil nilimot ng bahaghari ang araw
walang kulay na tanawin ang bituin
sa mundong lalawigan ng panambitan
ngunit huwag kang matakot sa banaag
hindi ka dapat mangamba
laging may sinag na pangako ang langit
laging kalasag ng liwanag ang buwan
Ipinaskil sa salamisim
nais pumasok
sa bintana, sa pintuan
sa bawat munting lagusan
walang hindi matuklasan, walang hindi mahawakan
ang lamig ng hangin
kapag dumaan
Ipinaskil sa talinghaga
sa lalim ng dilim
sa kawalan ng lihim
Ipinaskil sa hikbi
ano ang hinahanap
ng madalas sa minsan
ano ang timbang
ng balat sa laman
ano ang tinig
ng bulong na hiling
ano ang tunog
ng lagaslas ng lalim
ano ang halaga ng dilim
kung walang nakikinig sa kwento ng bituin
ang hiwaga ay naglalahong bula
kapag hindi inangkin ng diwang makata
Ipinaskil sa talinghaga
pumanaw tayo sa dalampasigan
magiliw ang alon
nung sumisid tayo sa lalim
hindi ka na muling umahon
iniwan mo ako sa baybayin
pangahas tayong nangarap
tuklasin ang ating salamangka
hamunin ang mga akala
bakit hindi ka nagpaalam ng tinawag ka nang bulong
nakita mo na ba ang liyab ng dagat
nasagot mo na ba ang mga bugtong
naaninag kita sa dapithapon ng minsan
sa bungad ng dumarating at lumilisan
naghihintay ka pa ba
naalala mo pa ba tayo
ako na naging ikaw
ikaw na laging ako
pumanaw tayo sa dalampasigan
nakahimlay sa agos ng alinlangan
pinilit kang hindi mahalin
at nagdilim ang mga bituin
Ipinaskil sa hikbi
sa dugo ng kahapon
amuhin ang daluyong
Ipinaskil sa talinghaga
matagal na akong naglalakbay
dumadaan
wala pang nararating
Ipinaskil sa salamisim
may hiwaga ang daan
sa naghahanap ng kabuluhan
Ipinaskil sa talinghaga
Ipinaskil sa talinghaga
katha 