katha

panata

katha — Fri, 16 Oct 2009 05:00:04 +0000

may dapithapong nangingiming pumanaog sa dilim
dahil walang lambing ang umagang lumisan
walang init na mahanap ang gabi
kumot sa bangungot na tangan

may alinlangan ang bukang liwayway sa pagmulat
dahil nilimot ng bahaghari ang araw
walang kulay na tanawin ang bituin
sa mundong lalawigan ng panambitan

ngunit huwag kang matakot sa banaag
hindi ka dapat mangamba

laging may sinag na pangako ang langit
laging kalasag ng liwanag ang buwan

hamog

katha — Thu, 08 Jan 2009 05:55:56 +0000

nais pumasok
sa bintana, sa pintuan
sa bawat munting lagusan

walang hindi matuklasan, walang hindi mahawakan
ang lamig ng hangin
kapag dumaan

karimlan

katha — Tue, 06 Jan 2009 20:31:53 +0000

uukitin ko itong damdamin

sa alikabok ng hangin

walang bigat, walang tinig

sa lalim ng dilim

sa kawalan ng lihim

tula ng bula

katha — Thu, 23 Oct 2008 05:20:06 +0000

ano ang hinahanap
ng madalas sa minsan
ano ang timbang
ng balat sa laman
ano ang tinig
ng bulong na hiling
ano ang tunog
ng lagaslas ng lalim

ano ang halaga ng dilim
kung walang nakikinig sa kwento ng bituin

ang hiwaga ay naglalahong bula
kapag hindi inangkin ng diwang makata

sa aking alamat

katha — Wed, 15 Oct 2008 05:34:58 +0000

pumanaw tayo sa dalampasigan

magiliw ang alon
nung sumisid tayo sa lalim
hindi ka na muling umahon
iniwan mo ako sa baybayin

pangahas tayong nangarap

tuklasin ang ating salamangka
hamunin ang mga akala

bakit hindi ka nagpaalam ng tinawag ka nang bulong

nakita mo na ba ang liyab ng dagat
nasagot mo na ba ang mga bugtong

naaninag kita sa dapithapon ng minsan
sa bungad ng dumarating at lumilisan

naghihintay ka pa ba
naalala mo pa ba tayo
ako na naging ikaw
ikaw na laging ako

pumanaw tayo sa dalampasigan
nakahimlay sa agos ng alinlangan

takipsilim

katha — Mon, 22 Sep 2008 12:12:27 +0000

pinilit kang hindi mahalin
at nagdilim ang mga bituin

unos

katha — Sun, 21 Sep 2008 18:05:13 +0000

magbabaha ng luha
ang tigang na lupa

sa dugo ng kahapon
amuhin ang daluyong

ligaw

katha — Fri, 19 Sep 2008 21:46:29 +0000

matagal na akong naglalakbay
dumadaan
wala pang nararating

masalimuot ang biyaheng ito
paikot-ikot
sadyang maliligaw

lalo’t malayo ang tingin

tuklas

katha — Fri, 19 Sep 2008 07:53:31 +0000

may hiwaga ang daan
sa naghahanap ng kabuluhan

binhi

katha — Thu, 18 Sep 2008 01:18:08 +0000

ito ay isang
pagbabalik
sa kandungan
ng mga panaginip